‘బాహుబలి’ సినిమాతో ప్రభాస్ ఒక్కసారిగా పాపులర్ అయినాడు. ఒక తెలుగు హీరో పాన్ ఇండియా స్థాయిలో స్టార్‌డమ్ సంపాదించడాన్ని ఆయన ఫ్యాన్స్‌తో పాటు ఇండస్ట్రీ సెలబ్రేట్ చేసుకుంది. అలాంటి హీరో ‘KGF’ లాంటి యాక్షన్ ఫ్రాంచైజ్‌ను ఇచ్చిన దర్శకుడు ప్రశాంత్ నీల్‌తో సినిమా అంటే అంచనాలు ఆకాశాన్ని అంటాయి.
ఈ సినిమా ఎప్పుడెప్పుడు వస్తుందా అని ప్రభాస్ ఫ్యాన్స్ ఎదురుచూశారు. ఈ క్రమంలో రెండు ఫ్లాపులను (రాధేశ్యామ్, ఆదిపురుష్) చూసేశారు. మొత్తానికి మూడేళ్ల నిరీక్షణ తర్వాత ఈ రోజు ‘సలార్’ ప్రేక్షకుల ముందుకు వచ్చింది. మరి అభిమానుల నిరీక్షణను, వారి దాహాన్ని ఈ సినిమా తీర్చిందా? లేదా ఇప్పుడు చర్చిద్దాం.
ఒక్క మాటల్లో చెప్పాలంటే ఇప్పటి వరకు పురాణాల్లో, చరిత్రలో జరిగిన యుద్ధాలన్నీ ఆధిపత్యం కోసమే. సింహాసనం కోసమే. కుర్చీ కోసం కుటుంబంలోనే కలహాలు మొదలై వెన్నుపోట్లు పొడిచిన ఎన్నో కథలు మనం చదువుకున్నాం. రాజ్యాధికారం కోసం ఒక జాతినే అంతం చేసిన నిరంకుశత్వాన్ని చూశాం. మనకు తెలిసిన ఇలాంటి అంశాలన్నింటితో కలగలిపిన కథే ‘సలార్’.
ఇది కూడా చదవండి
ఈ సినిమాలో రాజ్యం ఖాన్సార్. ఇది భారత్‌లోనే ఉన్న ఒక స్వతంత్య్ర రాజ్యం. భారత ప్రభుత్వం కన్నెత్తి కూడా చూడని ఒక భయంకరమైన రాజ్యం. ఈ రాజ్యంలో వరదరాజ మన్నార్ (పృథ్వీరాజ్ సుకుమారన్) మరియు దేవా (ప్రభాస్) ప్రాణ స్నేహితులు. వరదరాజ కోసం ఏం చేయడానికైనా సిద్ధపడే మిత్రుడు దేవా. ఒకరోజు కొందరు దేవా తల్లి (ఈశ్వరీరావు) పై దాడిచేయడానికి వస్తారు. వాళ్ల నుంచి దేవాను, అతడి తల్లిని వరదరాజ కాపడతాడు.
వాళ్లను ఖాన్సార్ నుంచి దూరంగా పంపేస్తాడు. గతాన్ని మరిచిపోయి దేవా తన తల్లితో కలిసి ఇండియా-బర్మా బోర్డర్‌లోని టిన్సుకియాలో ఉంటాడు. తల్లి మాట జవదాటకుండా ఒక గనిలో మెకానిక్‌గా పనిచేసుకుంటూ కాలం వెల్లదీస్తాడు. ఈ సమయంలో ఆధ్య (శృతిహాసన్)ను దేవా కాపాడాల్సి వస్తుంది. ఈమెను కాపాడడం వల్ల దేవా చిక్కుల్లో పడతాడు. అసలు ఎవరు ఈ ఆధ్య? ఆమెకు ఖాన్సార్‌కు సంబంధం ఏంటి? ఖాన్సార్‌లో దేవా, అతడి తల్లిపై దాడి చేసినవారు ఎవరు? ఇలాంటి ప్రశ్నలన్నింటికీ సినిమాలో సమాధానం దొరుకుతుంది.
నిజానికి ‘సలార్’ సినిమా కాస్త టిపికల్‌గా ఉంటుంది. అర్థం చేసుకోవడానికి కాస్త సమయం పడుతుంది. ‘పొన్నియన్ సెల్వన్’ సినిమా చూసినప్పుడు అందులోని పాత్రలు, వాటి మధ్య సంబంధాలు గుర్తుపెట్టుకోవడానికి ఎంత ఇబ్బంది పడతామో ఇంచుమించుగా అలాంటి ఇబ్బంది ‘సలార్’ కథలోనూ ఉంది. ఇందులోనూ పాత్రలు చాలా ఎక్కువ. వాటిని వివరించడానికి దర్శకుడు ప్రశాంత్ నీల్ తీసుకున్న సమయం చాలా తక్కువ.
ఎందుకంటే ఈ సినిమాలో యాక్షన్ సీక్వెన్సులు, ఎలివేషన్లకే ఎక్కువ సమయం కేటాయించారు. ప్రభాస్‌ను ఎలా అయితే చూడాలని ఆయన అభిమానులు కోరుకుంటారో అలా చూపించారు ప్రశాంత్ నీల్. ప్రభాస్ నరుకుతుంటే మళ్లీ ‘ఛత్రపతి’లోని శివ గుర్తుకొస్తాడు. కానీ ఈ దేవా రేంజ్ మాత్రం శివ కంటే చాలా ఎక్కువ. ఒక ఉగ్రరూపంలా కనిపిస్తుంది ప్రభాస్ కటౌట్. యాక్షన్ సీన్స్‌లో ప్రభాస్‌ను చూస్తుంటే ఫ్యాన్స్ తమను తాము మైమరిచిపోవడం ఖాయం.
సినిమా మొదలైన తర్వాత సుమారు 45 నిమిషాల వరకు ఏమీ లేదే అనిపిస్తుంది. ప్రేక్షకుడిని అసలు కథలోకి తీసుకెళ్లడానికి ప్రశాంత్ నీల్ ఇంత సమయం తీసుకున్నారు. కానీ, ఆ తర్వాత పరుగు మొదలవుతుంది. ప్రీ ఇంటర్వెల్ ఫైట్, ఇంటర్వల్ బ్యాంగ్ మామూలుగా లేవు. తల్లి మాటకు కట్టుబడి ఎవరేమన్నా చేయి ఎత్తకుండా పక్కకు తప్పుకుని వెళ్లిపోయే దేవా మళ్లీ ఆ తల్లే ఇక మొదలుపెట్టు అన్నప్పుడు జరిగిన మారణహోమం అంతా ఇంతా కాదు.
ఇంటర్వల్ వరకు కథ సింపుల్‌గానే అనిపిస్తుంది. కానీ సెకండాఫ్ మొదలైన తర్వాత ఒకరు బ్యాక్‌గ్రౌండ్‌లో ఖాన్సార్ కథ చెప్తూ తెరపై దేవా విధ్వంసం చూపిస్తుంటే ప్రేక్షకుడు కథకు కనెక్ట్ కావడం కొద్దిగా కష్టమవుతుంది. సెకండాఫ్‌లో ప్రశాంత్ నీల్ రాసుకున్న సీన్లలో ఇంకాస్త స్పష్టత ఉంటే బాగుండేది. అలాగే ఎమోషనల్ కనెక్షన్ కూడా మిస్ అయ్యింది. కానీ ఫైట్స్ విషయంలో మాత్రం ప్రశాంత్ నీల్ తోపు అనిపిస్తుంది.
ప్రభాస్ క్యారెక్టరైజేషన్, ఫైట్లు, ఆయన గెటప్ అదిరిపోయాయి. ఈ విషయంలో ప్రశాంత్ నీల్‌ను ప్రశంసించకుండా ఉండలేం. అభిమానులు ఎలా అయితే కోరుకున్నారో దానికి రెండింతలు ఎక్కువగానే ప్రభాస్‌ను చూపించారు. ప్రశాంత్ నీల్ సినిమాలో డైలాగులు కాస్త తక్కువగానే ఉంటాయి. పాత్ర రియాక్షన్ ఎక్కువగా ఉంటుంది. ఇందులోనూ అంతే. ఆయన గత చిత్రం KGF స్టైల్‌నే ప్రశాంత్ నీల్ ఫాలో అయిపోయారు. ఇక ఈ సినిమా కథనం కూడా ప్రశాంత్ నీల్ స్టైల్‌లో టిపికల్‌గా ఉంటుంది.
అది కాస్త కనెక్ట్ అవ్వడం కష్టం. కానీ, సెకండాఫ్‌లో వచ్చే కొన్ని సన్నివేశాలు, ఫైట్లు మాత్రం రోమాలు నిక్కబొడిచేలా చేస్తాయి. అయితే, ‘సలార్’ కథలో చాలా ప్రశ్నలను రెండో భాగం కోసం వదిలేశారు దర్శకుడు. ప్రాణ స్నేహితులే బద్ధ శత్రువులుగా మారారని ట్రైలర్‌లో చెప్పారు. అయితే, ఎలా బద్ధశత్రువులుగా మారారు అనేది రెండో భాగంలో చూడాలి. అసలు సలార్ ఎవరు? అతడి బ్యాక్‌గ్రౌండ్ ఏంటనే విషయాన్ని ఈ మొదటి భాగంలో రివీల్ చేశారు. ఆ ట్విస్టే ప్రేక్షకుడికి మంచి కిక్ ఇస్తుంది. ఆ కిక్కుతోనే థియేటర్ నుంచి బయటికి వస్తాడు.
సినిమాలో చాలా పాత్రలు ఉన్నాయి. వాటన్నింటికీ ప్రాధాన్యత ఉంది. చిన్న చిన్న పాత్రలకు కూడా ఒక హైప్ ఉంటుంది. ముఖ్యంగా ఝాన్సీ పోషించిన పాత్ర సినిమా ప్రారంభంలోనే ప్రేక్షకులను ఆకట్టుకుంటుంది. జగపతిబాబు, పృథ్వీరాజ్ సుకుమారన్, శ్రియారెడ్డి, గరుడ రామ్, జాన్ విజయ్, బాబీ సింహా, బ్రహ్మాజీ, టిను ఆనంద్, మైమ్ గోపి, షఫీ ఇలా అందరూ తమ పాత్రల్లో జీవించేశారు. ఇక ప్రభాస్ స్క్రీన్ ప్రెజెన్స్ గురించి చెప్పాల్సిన అవసరమే లేదు. డైలాగులు తక్కువే కానీ ఆయన స్టైల్, మేనరిజం, యాక్షన్ మామూలుగా లేవు. ఫ్యాన్స్‌కి ఆయన ప్రెజెన్స్ ఫుల్ మీల్స్‌లా ఉంటుంది. ఆయన స్క్రీన్ మీద కనబడితేనే లేచి ఈలలు వేసేలా ఉంటారు. సినిమాకు ఊపిరి సలార్ అలియాస్ దేవా క్యారెక్టర్.
సినిమా టెక్నికల్‌గానూ చాలా బాగుంది. ఖాన్సార్ అనే సామ్రాజ్యాన్ని అద్భుతంగా చూపించారు ప్రశాంత్ నీల్. ఇది ఒక యూరప్ సిటీలా అనిపిస్తుంది. భువన గౌడ సినిమాటోగ్రఫీ అద్భుతంగా ఉంది. అయితే, అక్కడక్కడా KGF ఛాయలు కనిపిస్తాయి. కొంత మంది ప్రేక్షకులు పోలికలు కూడా పెట్టొచ్చు. ఇక, రవి బస్రూర్ నేపథ్య సంగీతం మాత్రం ఊహించిన స్థాయిలో లేదు. ‘KGF’తో పోలిస్తే ఆయన పనితనం తగ్గిందని అనిపిస్తుంది. ఎందుకంటే, కొన్ని యాక్షన్ సన్నివేశాల్లో బీజీఎం తేలిపోయింది. ఎడిటర్ ఉజ్వల్ కులకర్ణి తన పాత్రకు న్యాయం చేశారు.
ఈ సినిమా ప్రశాంత్ నీల్ దర్శకత్వంలోనే వచ్చిన కన్నడ చిత్రం ‘ఉగ్రం’కు రీమేక్ అని తెలిసిన విషయమే. ఆ సినిమా చూడని వాళ్లకు ‘సలార్’ కొత్తగా అనిపిస్తుంది. ‘ఉగ్రం’ చూసేసినవాళ్లకు కథ తెలిసిపోతూ ఉంటుంది. కానీ, టేకింగ్ మాత్రం దానికి దీనికి చాలా తేడా ఉంది. ఇక సినిమాను ముగిస్తూ రెండో భాగం టైటిల్ ప్రకటించారు. ‘సలార్: పార్ట్ 2 – శౌర్యాంగ పర్వం’ ఆ టైటిల్. ఈ శౌర్యాంగ పర్వం ఏంటి అనుకుంటున్నారా? సినిమా చూస్తే తెలుస్తుంది.
నటులు- ప్రభాస్, శ్రుతిహాసన్, పృథ్వీరాజ్ సుకుమారన్, జగపతిబాబు, ఈశ్వరీరావు, శ్రియారెడ్డి, బాబీ సింహా, టిన్ను ఆనంద్, దర్శకుడు- ప్రశాంత్ నీల్, వ్యవధి- 2.55 ఘంటలు. (ఏజెన్సీలు)
