హైదరాబాద్: తెలంగాణలో అసెంబ్లీ ఎన్నికల వేళ రాజకీయ వాతావరణం హాట్ హాట్గా మారింది. ప్రధాన పార్టీలన్నీ క్షేత్రస్థాయిలో ప్రచారాన్ని మొదలుపెట్టాయి. ఇక బీఆర్ఎస్ పార్టీ అయితే ప్రచారంలో దూసుకుపోతోంది. అయితే తెలంగాణలో పోటీ కేవలం బీఆర్ఎస్, కాంగ్రెస్, బీజేపీ మధ్యే ఉండగా ఈసారి కొత్త పార్టీలు కూడా బరిలో దిగుతున్నాయి.
అందులో వైఎస్ షర్మిల నేతృత్వంలోనే వైఎస్సార్ తెలంగాణ పార్టీ ప్రత్యేకం. ఈ పార్టీకి కేంద్ర ఎన్నికల సంఘం కామన్ గుర్తును కేటాయించింది. రాష్ట్రంలోని 119 నియోజకవర్గాల్లో పోటీ చేసే పార్టీ అభ్యర్థులకు బైనాక్యులర్ గుర్తును కేటాయిస్తూ ఆదేశాలు జారీ చేసింది. అసలు వైఎస్సార్ తెలంగాణ పార్టీ నుంచి ఎంతో మంది పోటీ చేస్తున్నారన్నది ఇప్పుడు సర్వత్రా ఆసక్తి కలిగిస్తోన్న ప్రశ్నలు.
మరోవైపు పార్టీ పెట్టినప్పటి నుంచి బీఆర్ఎస్ ప్రభుత్వానికి వ్యతిరేకంగా ప్రచారం చేస్తూ పాదయాత్ర చేస్తూ వార్తల్లో నిలిచిన షర్మిల ఈ మధ్య కాస్త సైలెంట్ అయ్యారు. ఎన్నికల షెడ్యూల్ విడుదలకు ముందు ఆమె కాంగ్రెస్ పార్టీ అధిష్ఠానంతో పలు మార్లు భేటీ అయ్యారు.
దీంతో వైఎస్సార్ తెలంగాణ పార్టీని కాంగ్రెస్ పార్టీలో విలీనం చేస్తారని పెద్ద ఎత్తున వార్తలు వచ్చాయి. వాటికి బలం చేకూరుస్తూ షర్మిల కూడా కాంగ్రెస్ పార్టీ చేసిన తప్పులను తెలుసుకుందని క్షమించే గుణం తనకుందంటూ కీలక వ్యాఖ్యలు చేశారు. దీంతో ఇక విలీనమే తరువాయి అనుకున్నారంతా. కానీ ఆమె సైలెంట్ కావటమే కాదు, పార్టీ కూడా కోమలోకి వెళ్లిపోయింది.
అందుకు కారణం కాంగ్రెస్లో విలీనం అయితే తనకు కొన్ని నియోజకవర్గాల టికెట్లు కావాలని షర్మిల డిమాండ్ చేయగా ఆమె డిమాండ్లకు కాంగ్రెస్ అధిష్ఠానం ఒప్పుకోలేదన్నది సమాచారం. అయితే కాంగ్రెస్తో పలుమార్లు భేటీల అనంతరం అధిష్ఠానం నుంచి సానుకూల స్పందన రాకపోవటంతో పార్టీ కార్యకర్తలతో విస్తృత స్థాయి సమావేశం నిర్వహించారు.
ఈ సమావేశంలో ఈ అన్ని స్థానాల నుంచి పోటీ చేస్తామని షర్మిల చెప్పుకొచ్చారు. అందుకు అభ్యర్థులు కూడా సిద్ధంగా ఉన్నారంటూ తెలిపారు. అవసరమైతే విజయమ్మ, బ్రదర్ అనిల్ కూడా బరిలో దిగుతారని చెప్పుకొచ్చారు. ఆ ప్రకటన తర్వాత మళ్లీ ఇంతవరకు షర్మిల నుంచి ఎలాంటి ప్రకటన రాకపోవటం గమనార్హం.
అసలు వైఎస్సార్ తెలంగాణ పార్టీ నుండి ఇంతకూ ఎంత మంది పోటీ చేయనున్నారు? అసలు వైఎస్సార్ తెలంగాణ పార్టీ తెలంగాణ అసెంబ్లీ ఎన్నికల్లో పోటీ చేస్తుందా లేదా? పార్టీ స్టాండ్ ఏంటీ? అన్నది ఇప్పటివరకు షర్మిల చెప్పకపోవటంతో ఆమెను నమ్ముకుని ఇప్పటివరకు తనతో నడిచిన కార్యకర్తలు ఆయోమయంలో పడిపోయారు. (ఏజెన్సీలు)
