హైదరాబాద్: ఆల్ ఇండియా రైల్వే మెన్స్ ఫెడరేషన్ సౌత్ సెంట్రల్ జోనల్ మహాసభ ఈరోజు స్థానిక రైల్వే ఆడిటోరియంలో అత్యంత ఘనంగా నిర్వహించబడింది. జోనల్ ప్రెసిడెంట్ ఎస్. శ్రీధర్ అధ్యక్షతన జరిగిన ఈ మహాసభకు దక్షిణ మధ్య రైల్వేలోని సికింద్రాబాద్, హైదరాబాద్, నాందేడ్, కాజీపేట్, బెల్లంపల్లి తదితర అన్ని డివిజన్ల నుంచి ప్రతినిధులు (డెలిగేట్లు) భారీ సంఖ్యలో తరలివచ్చారు.
Also Read-
ఈ మహాసభలో జోనల్ సెక్రటరీ కె. శివకుమార్ తమ నివేదికను సమర్పించగా, ప్రతినిధులు స్వామి, అనిల్, కృష్ణకుమారి, గోపాల్ నాయుడు తదితరులు ఉద్యోగుల సంక్షేమం మరియు హక్కులపై కీలక తీర్మానాలను ప్రవేశపెట్టారు. మహిళా రిటైర్డ్ ఉద్యోగులు, 80 సంవత్సరాలు దాటిన సీనియర్ సిటిజన్లు కూడా పెద్ద ఎత్తున పాల్గొని ఈ కార్యక్రమాన్ని దిగ్విజయం చేశారు.
సభలో ఏకగ్రీవంగా ఆమోదించిన ముఖ్య తీర్మానాలు
- NPS, UPS రద్దు – OPS పునరుద్ధరణ: సీపీఎస్/ఎన్‌పీఎస్ (NPS) మరియు యుపిఎస్ (UPS) విధానాలను తక్షణమే రద్దు చేసి, ఉద్యోగులందరికీ పాత పెన్షన్ విధానాన్ని (OPS) పునరుద్ధరించాలి.
- 8వ వేతన సంఘంలో పెన్షన్ రివిజన్: రాబోయే 8వ పే కమిషన్‌లో పెన్షన్ రివిజన్‌ను స్పష్టంగా కల్పించాలి. లేని పక్షంలో దేశవ్యాప్తంగా పెద్ద ఎత్తున కార్మిక పోరాటాలు నిర్వహిస్తాం.
- వైద్య సేవలు: రైల్వే హాస్పిటళ్లలో మౌలిక వసతులు, వైద్య సౌకర్యాలను తక్షణమే మెరుగుపరచాలి.
- ప్రయాణ రాయితీలు: సీనియర్ సిటిజన్లకు రైలు ప్రయాణంలో 25% కన్సెషన్ (రాయితీ) సదుపాయాన్ని వెంటనే పునరుద్ధరించాలి.
- HRMS సమస్యల పరిష్కారం: హెచ్‌ఆర్‌ఎమ్‌ఎస్ (HRMS) వ్యవస్థలోని లోపాలను సరిదిద్ది ఉద్యోగులకు, పెన్షనర్లకు వేగవంతమైన సేవలు అందించాలి.
నూతన కమిటీల ఎన్నిక
ఈ మహాసభ వేదికగా సౌత్ సెంట్రల్ జోన్ తో పాటు సికింద్రాబాద్, హైదరాబాద్ డివిజన్ నూతన కమిటీలను ఏకగ్రీవంగా ఎన్నుకున్నారు. జోనల్ ప్రెసిడెంట్: ఎస్. శ్రీధర్ (తిరిగి ఎన్నిక), జోనల్ సెక్రటరీ: కె. శివకుమార్ (తిరిగి ఎన్నిక) వీరితో పాటు వర్కింగ్ ప్రెసిడెంట్, వైస్ ప్రెసిడెంట్, అసిస్టెంట్ సెక్రటరీలు, ట్రెజరర్‌తో కూడిన పూర్తి స్థాయి బాడీని ప్రకటించారు. రైల్వే కార్మికుల హక్కుల సాధనే ధ్యేయంగా రాబోయే రోజుల్లో పోరాటాలు తీవ్రతరం చేస్తామని ఈ సందర్భంగా నూతన కార్యవర్గం ప్రకటించింది.
