इन दस्तावेजों पर मुख्यमंत्री केसीआर और मंत्रियों ने किये हस्ताक्षर और…

हैदराबाद : मुख्यमंत्री केसीआर ने तेलंगानाकी राजधानी हैदराबाद शहर के मध्य में अत्याधुनिक सुविधाओं से निर्मित डॉ. बीआर अंबेडकर सचिवालय का उद्घाटन किया। इस मौके पर सीएम केसीआर समेत सभी मंत्री अपने-अपने चैंबर में मिले। बाद में सीएम केसीआर और मंत्रियों ने कई दस्तावेजों पर साइन किए।

హైద‌రాబాద్ : రాష్ట్ర రాజ‌ధాని హైద‌రాబాద్ న‌గ‌రం న‌డిబొడ్డున అత్యాధునిక వ‌స‌తుల‌తో నిర్మించిన డాక్ట‌ర్ బీఆర్ అంబేద్క‌ర్ స‌చివాల‌యాన్ని ముఖ్య‌మంత్రి కేసీఆర్ ప్రారంభించారు. ఈ సంద‌ర్భంగా సీఎం కేసీఆర్‌తో పాటు మంత్రులంద‌రూ త‌మ ఛాంబ‌ర్ల‌లో కొలువుదీరారు. అనంత‌రం ప‌లు ద‌స్త్రాల‌పై సీఎం కేసీఆర్, మంత్రులు సంత‌కాలు చేశారు.

ఈ ద‌స్త్రాల పైనే సీఎం, మంత్రుల మొద‌టి సంత‌కాలు

సీఎం కేసీఆర్ – కాంట్రాక్ట్ ఉద్యోగుల క్ర‌మ‌బ‌ద్దీక‌ర‌ణ ద‌స్త్రం
కేటీఆర్ – జీహెచ్ఎంసీ ప‌రిధిలో డబుల్ బెడ్రూంల కేటాయింపు మార్గ‌ద‌ర్శ‌కాలు
హరీష్ రావు – టీచింగ్ ఆసుపత్రుల్లో 1827 స్టాఫ్ న‌ర్సుల‌ డైరెక్ట్ రిక్రూట్మెంట్ భర్తీ ద‌స్త్రం
తలసాని శ్రీనివాస్ యాదవ్ – ఉచిత చేప పిల్లలు, గొర్రెల పంపిణీ ద‌స్త్రం

నిరంజన్ రెడ్డి – సబ్సిడీపై పచ్చిరొట్ట విత్తనాలు సరఫరా ద‌స్త్రం
గంగుల కమలాకర్ – ఐసీడీఎస్ పథకంలో భాగంగా అంగన్‌వాడీల‌కు మే నెల నుంచి పోషకాల సన్నబియ్యం అందించే ద‌స్త్రం

కొప్పుల ఈశ్వర్ – దళిత బంధు రెండో విడత ద‌స్త్రం
ఇంద్రకరణ్ రెడ్డి – జీహెచ్ఎంసీ పరిధిలోని దేవాలయాల్లో దూపదీప నైవేద్య ప్రారంభం ద‌స్త్రం

జ‌గ‌దీశ్ రెడ్డి – వ్యవసాయ విద్యుత్ సబ్సిడీ ద‌స్త్రం
స‌బితా ఇంద్రారెడ్డి – ట్యాబ్‌లు, లైబ్రరీ కార్న‌ర్ ద‌స్త్రం
స‌త్య‌వ‌తి రాథోడ్ – రాంజీ గోండు మ్యూజియానికి రూ. 10 కోట్ల కేటాయింపు ద‌స్త్రం
శ్రీనివాస్ గౌడ్ – సీఎం క‌ప్ నిర్వ‌హ‌ణ‌కు రూ. 3.2 కోట్ల మంజూరు ద‌స్త్రం

మహమూద్ అలీ – కొత్త పోలీస్ స్టేషన్ల మంజూరు ద‌స్త్రం
వేముల ప్రశాంత్ రెడ్డి – రోడ్లు భవనాల శాఖ పునర్వ్యవస్థీకరణ ద‌స్త్రం
మల్లారెడ్డి – శ్రమ శక్తి అవార్డుల ద‌స్త్రం
దయాకర్ రావు – ఐకేపీ గ్రూపులకు మండలాల వారీగా కొత్త భవనాల ద‌స్త్రం

అంతర్జాతీయ నగరాలకు ధీటుగా తెలంగాణ : సీఎం కేసీఆర్‌

దీనికంటే ముందు…

డాక్టర్‌ బీఆర్‌ అంబేద్కర్‌ నూతన సచివాలయాన్ని ప్రారంభించిన అనంతరం CM KCR మాట్లాడారు. అంత‌ర్జాతీయ న‌గ‌రాల‌కు ధీటుగా తెలంగాణ రూపుదిద్దుకుంటుందున్నదని రాష్ట్ర ముఖ్యమంత్రి కల్వకుంట్ల చంద్రశేఖరరావు అన్నారు. “తెలంగాణలో వెలుగు జిలుగుల‌తో తెలంగాణ విరాజిల్లుతోంది. ఇది తెలంగాణ పున‌ర్నిర్మాణం. క‌రెంట్ షాక్‌ల‌తో రైతులు చ‌నిపోయారు. కానీ, నేడు 24 గంట‌ల క‌రెంట్‌తో రైతులు కంటి నిండా నిద్ర పోతున్నారు. గ్రామాలు, పట్టణాలు అభివృద్ధి చెందుతున్నాయి. అనేక అవార్డులు సొంతం చేసుకుంటున్నాయి. ఆగ‌మైపోయిన అడ‌వులు పున‌ర్నిర్మాణం చేసుకున్నాం.

మ‌హిళ‌ల‌కు భ‌రోసానిస్తూ భ‌రోసా కేంద్రాలు, షీ టీమ్స్ ప‌ని చేస్తున్నాయి. అరాచ‌క ముఠాల‌ను నివారిస్తున్నాం. స‌మ్మిళిత అభివృద్ధితో ముందుకు పోతున్నాం. పారిశ్రామిక రంగంలో ల‌క్షల కోట్ల పెట్టుబ‌డులు వ‌చ్చాయి. ఐటీ విధానంలో బెంగ‌ళూరును దాటి పోతున్నాం. మురికి కూపాలుగా ఉన్న ప‌ట్టణాల‌ను అభివృద్ధి చేస్తున్నాం. ప‌చ్చద‌నం, డంపుయార్డుల‌తో, ఇంటిగ్రేటెడ్ మార్కెట్‌ల‌తో ప‌ట్టణాలు, గ్రామాలు అభివృద్ధి చెందుతున్నాయి. అంత‌ర్జాతీయ న‌గ‌రాల‌కు ధీటుగా రూపుదిద్దుకుంటుంది తెలంగాణ‌. అండ‌ర్ పాస్‌లు, ఫ్లై ఓవ‌ర్లు, లింక్ రోడ్లతో హైద‌రాబాద్ అభివృద్ధి చెందుతుంది. న‌గ‌రం న‌లుదిక్కులా సూప‌ర్ స్పెషాలిటీ హాస్పిట‌ల్స్ నిర్మిస్తున్నాం.

యాదాద్రి ఆల‌య పున‌ర్నిర్మాణం ప్రపంచానికే ఆద‌ర్శంగా నిలుస్తుంది. ప్రపంచంలో అభివృద్ధిని, పున‌ర్నిర్మాణాన్ని కొల‌మానంగా తీసుకునే సూచిక‌లు రెండే రెండు ఉన్నవి. ఒక‌టి ప‌ర్ క్యాపిట ఇన్‌కం. రెండోది ప‌ర్ క్యాపిట ప‌వ‌ర్ యుటిలైజేష‌న్. ఇవి నిజ‌మైన అభివృద్ధి సంకేతాలు. నేష‌న‌ల్, జాతీయ స్థాయిలో ముందున్నాం. తెలంగాణ వ‌చ్చిన నాటి నుంచి ఇప్పటి వ‌ర‌కు ఆర్థిక క్రమ‌శిక్షణ పాటిస్తూ, దేశంలోనే నంబ‌ర్ వ‌న్ స్థాయికి ప‌ర్ క్యాపిట‌లో ముందున్నాం. ప‌వ‌ర్ యుటిలైజేష‌న్‌లో 2,140 యూనిట్లతో దేశంలోనే అగ్రభాగాన ఉన్నాం. ఆస‌రా పెన్షన్లతో పేద‌ల ముఖాల్లో చిరున‌వ్వులు చూస్తున్నాం. స‌చివాల‌యం నిర్మాణంలో పాల్గొన్న ప్రతి ఒక్కరికి హృద‌య‌పూర్వకంగా అభినంద‌న‌లు తెలియ‌జేస్తున్నాను” అన్నారు.

తెలంగాణ పునర్నిర్మాణమంటే ఇదీ! ప్రతిపక్షాలపై కేసీఆర్‌ ఘాటు వ్యాఖ్యలు

తెలంగాణ రాష్ట్ర ఏర్పాటు అనంతరం.. రాష్ట్ర పునర్నిర్మాణంపై ప్రతిపక్షాలు చేసిన వ్యాఖ్యలపై రాష్ట్ర ముఖ్యమంత్రి కేసీఆర్‌ ధ్వజమెత్తారు. డాక్టర్‌ బీఆర్‌ అంబేద్కర్‌ తెలంగాణ సచివాలయాన్ని సీఎం ఆదివారం ప్రారంభించారు. అనంతరం ఏర్పాటు చేసిన కార్యక్రమంలో మాట్లాడారు. ‘తెలంగాణ అవతరణకు ముందు అనేక వాదోపవాదాలు, అనేక చర్చలు చూశాం. తెలంగాణ అవతరించిన తర్వాత కూడా పునర్నిర్మాణం కోసం అంకితభావంతో అడుగులు వేసే సందర్భంలో కొందరు అర్భకులు తెలంగాణ భావాన్ని, అర్థాన్ని, పునర్నిర్మాణ కాంక్షను జీర్ణించుకోలేని పిచ్చివాళ్లు కొందరు కారుకూతలు కూశారు. కొన్ని పిచ్చివాంతులు కూడా చేసుకున్నారు. తెలంగాణ రాష్ట్ర పునర్నిర్మాణం అంటే ఏంటీ? ఉన్నయన్ని కూలగొట్టి మళ్లీ కడతారా? మొత్తం తెలంగాణనే కూలగొట్టి మల్ల కడతారా? అని విపరీతమైనటువంటి, దుర్మార్గమైనటువంటి కురచ వ్యక్తులు, మరుగుజ్జులు చిల్లర వ్యాఖ్యలు చేశారు. మనం వేటినీ పట్టించుకోకుండా ఈ రోజు ఆకాశమంత ఎత్తుకు ఎదిగిపోయింది నా తెలంగాణ రాష్ట్రం గర్వంగా ప్రకటిస్తున్నా’నన్నారు.

మండ వేసవిలో మత్తడి దుంకే చెరువులే పునర్నిర్మాణానికి భాష్యం

‘పునర్నిర్మాణం అంటే ఏంటో తెలియని మరుగుజ్జులకు నాలుగు మాటలు చెప్పదలచుకున్న. పునర్నిర్మాణం అంటే నాడు సమైక్య పాలనలో చిక్కిశల్యమైపోయి.. శిథిలమైపోయి రంధ్రాలతో మొత్తం వచ్చిన నీటిని కూడా కోల్పోయి అద్భుతమైన కాకతీయ రాజుల స్ఫూర్తితో నిర్మాణమైనటువంటి చెరువులన్నింటిని పునరుద్ధరించి ఎండాకాలంలో కూడా మత్తల్లు దుంకే చెరువులే పునిర్మాణానికి భాష్యం. అనేకమైన ఉపనదులు తెలంగాణలో ఉన్నాయి. జీవనదులు ఉన్నాయి. ఉద్యమం సందర్భంలో ఆదిలాబాద్‌, కరీంనగర్‌ జిల్లాల మధ్య గోదావరి నది ఎప్పుడు దాటినా నదీమాతకు.. నాణేలు నదిలో వేసి రెండుచేతులు జోడించి దండంపెట్టి.. తల్లీ మా భూమి మీదకు ఎప్పుడు వస్తవ్‌? మా పొలాలు ఎప్పుడు పండిస్తావని ఎంతో ఆర్తితో దండంపెట్టేవాడని.

నాటి సమైక్య రాష్ట్రంలో దుస్థితి ఏంటంటే గోదావరి డబ్బులు, రాగి నాణేలు వేద్దామంటే నీళ్లు ఎక్కడున్నాయో వెతుక్కొని రామగుండం వద్ద బిడ్జి మీద నుంచి నడిచి ఎక్కడ చిన్నపాటి గుంతలో నీళ్లు కనిపిస్తే వేసేది. ఈ రోజు రామగుండానికి వెళ్తే కండ్ల ముందే ఉన్నరు. స్పెషల్‌ చీఫ్‌ సెక్రెటరీ, ఇరిగేషన్‌ చీఫ్‌ సెక్రెటరీల ఆధ్వర్యంలో తెలంగాణ ఇంజినీర్లు ప్రపంచంలోనే అతిపెద్ద లిఫ్టిఇరిగేషన్ నిర్మాణం జరిగింది. ఈ ప్రాజ్టెకు శిఖరాయమానంగా ప్రపంచానికే తలమానికంగా వెలిగింది. ఇదీ పునర్నిర్మాణం. వాగుల మీద నిర్మించిన చెక్‌డ్యామ్‌లో గోదావరి, కృష్ణ, మంజీర, మానేరు, హల్దీ, కూడవెళ్లి తదితర ఉప నదులపై నిర్మించిన చెక్‌డ్యామ్‌లు ఏప్రిల్‌, మేలో కూడా మత్తడి దుంకడమే.. కళ్లుండి చూడలేని కబోదులకు తెలంగాణ పునర్నిర్మాణానికి భాష్యం’ అన్నారు.

తెలంగాణ పునర్నిర్మాణం అంటే ఒక కాళేశ్వరం

‘ఆ నాడు నెర్రలుబారి నోళ్లువెల్లబెట్టి బీళ్లుగా లక్షలాది ఎకరాల తెలంగాణ భూములు నేడు నిండు నీటిపారుదలకు నోచుకొని లక్షల ఎకరాల పంట పొలాలు వెదజల్లుతున్న హరితకాంత్రే తెలంగాణ పునర్నిర్మాణం. ఒక మాట గర్వంగా చెప్పాలి. ఈ యాసంగి పంటలో భారతదేశంలో ఉన్న వరి పైరు 94లక్షల ఎకరాలు. ఇందులో 56లక్షల ఎకరాలు తెలంగాణలో యాసంగిలో పంట పండుతున్నది నేను సగర్వంగా చెబుతున్నా. ఆ పొలాల్లో కనిపిస్తున్న హరితక్రాంతే తెలంగాణ పునర్నిర్మాణం. తెలంగాణ పునర్నిర్మాణం అంటే ఒక కాళేశ్వరం. ఒక పాలమూరు ఎత్తిపోతల పథకం. ఒక సీతారామా ప్రాజెక్టు అని మనవి చేస్తున్నా.

అర్ధరాత్రి కరెంటు పోయి.. ఎప్పుడు వస్తుందో తెలియక, పారిశ్రామికవేత్తల ధర్నాలు, ప్రజల గగ్గోలు, జనరేటర్లు, ఇన్వర్టర్లు, కన్వర్టర్లతో ఉన్న రాష్ట్రంలో నేడు అవన్నీ మాయమై అద్భుతమైనటువంటి కాంతులతో వెలుగుజిలుగులతో జాజ్వల్యమానంగా, కరెంటు వెలుగులతో విరాజిల్లుతున్న తెలంగాణ ఇదీ పునిర్మాణం అంటే. అర్ధరాత్రి కరెంటు పెట్టేందుకు వెళ్లి పొలాల దగ్గర కరెంటు షాకులతో చనిపోయిన రైతులు నాడు, పాము, తేళ్లకాట్లతో చనిపోయిన రైతులు నాడు. నేడు దినం పూటనే సాయంత్రం 6 గంటల వరకు పొలాలను పారించుకొని దర్జాగా ఇంటికి వచ్చి కంటినిండా కునుకుపోతున్న మా తెలంగాణ రైతుల దర్పమే తెలంగాణ పునిర్మాణమని తెలియజేస్తున్నా’నన్నారు.

తెలంగాణ పునర్నిర్మాణానికి ప్రతీక మిషన్‌ భగీరథ

‘గ్రామాలు, పట్టణాలు ఎంత అద్భుతంగా అలరాలుతున్నాయో, ఎన్ని అవార్డులు సొంతం చేసుకుంటున్నాయో మీ అందరికీ తెలుసు. క్షీణించిపోయి, పత్తాలేకుండాపోయి అగమైనపోయిన అడవులు.. పీసీసీఎఫ్‌లు శోభ, డోబ్రియాల్‌ నేతృత్వంలో అటవీశాఖ అధికారుల పట్టుదల, కృషితో భూపాల్‌రెడ్డి, ప్రియాంక సారథ్యంలో దేశంలోనే ఆల్‌టైమ్‌ రికార్డుగా హరితశోభను వెదజల్లుతున్నయో అదీ తెలంగాణ పునర్నిర్మాణం అంటే. కోల్పోయిన అడవులను తిరిగి తెచ్చుకోడమే పునిర్మాణమని ఆ అర్భకులు, ఆ మరుగుజ్జులకు చెబుతున్నా.

వలసపోయిన పాలమూరు కూలీలు ఒక్కరూ కూడా వలసలో లేకుండా మొత్తం కూడా తిరిగి వచ్చి వాళ్ల సొంత పొలాల గట్ల మీద కూర్చుంటే ఇతర రాష్ట్రాల కూలీలు తెలంగాణ పొలాల్లో పని చేస్తున్న దృశ్యాలే తెలంగాణ పునర్నిర్మాణమని చెబుతున్నా. ఒకనాడు దాహంతో అల్లాడి, ఫ్లోరైడ్‌ నడుం వంగి లక్షలాది మంది జీవితాలు కోల్పోయిన, కుమిలిపోయిన తెలంగాణలో మిషన్‌ భగరీథలో ఇంటింటికీ నీరందిస్తున్నాం. హైదరాబాద్‌ బంజారాహిల్స్‌ ఏ నీళ్లు ఉంటయో.. ఆదిలాబాద్‌ గోండుగూడెంలో అదే నీరందిస్తున్న మిషన్‌ భగరీథ తెలంగాణ పునర్నిర్మాణానికి ప్రతీక’ అని కేసీఆర్‌ స్పష్టం చేశారు.

ముఖ్యమంత్రి కేసీఆర్‌కు శుభాకాంక్షలు తెలిపిన మంత్రులు

తెలంగాణ ప్రభుత్వం నూతనంగా నిర్మించిన సచివాలయాన్ని (Secretariat) ముఖ్యమంత్రి కేసీఆర్‌ (CM KCR) ప్రారంభించారు. ఆరో అంతస్తులోని సీఎం కార్యాలయానికి వెళ్లిన ముఖ్యమంత్రి… సుముహూర్త సమయంలో కుర్చీలో ఆసీనులయ్యారు. ఆరు దస్త్రాలపై సంతకాలు చేశారు. కాంట్రాక్టు ఉద్యోగుల రెగ్యులరైజేషన్‌ ఫైలుపై తొలి సంతకం చేశారు. సీఎం కేసీఆర్‌కు వేద పండితులు ఆశీర్వచనం అందించారు.

నంతరం స్పీకర్‌ పోచారం శ్రీనివాస్‌ రెడ్డి, మండలి చైర్మన్‌ గుత్తా సుఖేందర్‌ రెడ్డి, మంత్రులు ప్రశాంత్‌ రెడ్డి, మల్లారెడ్డి, నిరంజన్‌ రెడ్డి, హరీశ్‌ రావు, గంగుల కమలాకర్‌, జగదీశ్‌ రెడ్డి, శ్రీనివాస్‌ గౌడ్‌, ఎర్రబెల్లి దయాకర్‌ రావు, సత్యవతి రాథోడ్‌, సబితా ఇంద్రారెడ్డి, మహమూద్‌ అలీ, తలసాని శ్రీనివాస్‌ యాదవ్‌, కొప్పుల ఈశ్వర్‌, ఎంపీలు కే.కేశవరావు, నామా నాగేశ్వరరావు, పలువురు ఎంపీలు, ఎమ్మెల్సీలు, ఎమ్మెల్యేలు, నాయకులు సీఎం కేసీఆర్‌కు శుభాకాంక్షలు తెలిపారు. మంత్రి మహమూద్‌ అలీ.. ముఖ్యమంత్రికి దట్టీ కట్టారు. (ఏజెన్సీలు)