హైదరాబాద్: తెలంగాణలో గవర్నర్ వర్సెస్ ప్రభుత్వం పొలిటికల్ వారు కొనసాగుతుండగా హైకోర్టు ఆదేశాలకు అనుగుణంగా రాజ్భవన్లో 74వ గణతంత్ర దినోత్సవాలు జరుగుతున్నాయి. రాష్ట్రానికి ప్రథమ పౌరురాలు అయిన గవర్నర్ తమిళిసై సౌందరరాజన్ త్రివర్ణ పతాకాన్ని ఆవిష్కరించారు. ఆ తర్వాత రాష్ట్ర ప్రజలు అందరికీ 74వ గణతంత్ర దినోత్సవ శుభాకాంక్షలు తెలిపారు.
ఈసారి గణతంత్ర వేడుకలు ఎక్కడ జరపాలి అనే అంశంపై కొంత సస్పెన్స్ కొనసాగింది. ఈ అంశం హైకోర్టు ముందుకు వెళ్లడంతో హైకోర్టు కీలక ఆదేశం ఇచ్చింది. పరేడ్ గ్రౌండ్స్లో గానీ లేదా ఇతర ఏ ప్రాంతంలోనైనా రిపబ్లిక్ డే వేడుకలు జరపాలని ప్రభుత్వాన్ని ఆదేశించింది. పరేడ్ కూడా ఉండాలనీ, కేంద్రం గైడ్లైన్స్ పాటించాలని నిన్న స్పష్టం చేసింది. ఐతే టైమ్ ఎక్కువగా లేకపోవడంతో ముందుగా అనుకున్నట్లుగానే ఈసారి రాజ్భవన్ లోనే నిర్వహిస్తున్నారు. అక్కడే పరేడ్ కూడా ఉంది.
![](https://telanganasamachar.online/wp-content/uploads/2023/01/raj-bhavan2.png)
రాష్ట్రంలో కొంతకాలంగా గవర్నర్, ప్రభుత్వం మధ్య పొలిటికల్ వార్ కొనసాగుతోందని మనకు తెలుసు. ఆ ప్రభావం గణతంత్ర దినోత్సవాలపై పడటం దురదృష్టకరం అని ప్రతిపక్షాలు భగ్గుమంటున్నాయి. ప్రతి సంవత్సరం రిపబ్లిక్ డే వేడుకల్ని సికింద్రాబాద్లోని పరేడ్ గ్రౌండ్స్లో జరుపుతున్నారు. కరోనా కారణం చెప్పి.. ప్రభుత్వం రెండేళ్లుగా రాజ్భవన్ లోనే ఈ కార్యక్రమం జరిపిస్తోంది.
![](https://telanganasamachar.online/wp-content/uploads/2023/01/bhaktaram.1-14.jpg)
ఈ సంవత్సరం కరోనా లేకపోయినా కరోనా ఉందనే కారణం చెప్పింది. ఈ అభిప్రాయాన్ని హైకోర్టు తప్పుపట్టింది. రాజకీయ సభలకు 5 లక్షల మంది ప్రజలను తరలించినప్పుడు లేని కరోనా గణతంత్ర దినోత్సవాలకు ఉందా అని ప్రశ్నించింది. ఈ క్రమంలో ప్రభుత్వం.. రాజ్భవన్లో పరేడ్తో సహా ఈ కార్యక్రమాన్ని నిర్వహిస్తోంది. (ఏజెన్సీలు)